Gjatë 24 orëve të fundit, konflikti midis Ukrainës dhe Rusisë është shoqëruar me një intensifikim të sulmeve ajrore dhe me dronë, duke shkaktuar dëme të konsiderueshme në infrastrukturë dhe humbje jetësh njerëzore në të dyja palët.
Situata në Ukrainë
Autoritetet ukrainase njoftuan se tetë persona humbën jetën si pasojë e goditjeve ruse në disa rajone. Në Kharkivit, një sulm me dron shkaktoi vdekjen e një personi dhe plagosi nëntë të tjerë. Në rajonin e Dnipropetrovskut, dy gra të moshës 35 dhe 74 vjeç u vranë gjatë sulmeve me artileri dhe bomba ajrore. Rajoni i Zaporizhzhias regjistroi një viktimë dhe 12 të plagosur, ndërsa autoritetet raportuan mbi 1.029 sulme në 50 vendbanime. Në Kherson, dy persona u vranë dhe 24 të tjerë mbetën të plagosur, duke shkaktuar dëme në ndërtesa banimi, kisha dhe rrjete të gazit. Një viktimë tjetër u raportua në rajonin e Sumyt.
Presidenti Volodymyr Zelenskyy denoncoi gjithashtu planet e Moskës për të angazhuar rreth 30 mijë ushtarë nga Koreja e Veriut në frontin e luftës. Nga ana tjetër, presidenti i Kazakistanit i bëri thirrje Vladimir Putinit për t’i dhënë fund konfliktit, duke kërkuar ndalimin e humbjeve të jetëve të të rinjve.
Situata në Rusi
Në territorin rus, autoritetet lokale raportuan se sulmet me dronë të kryera nga Ukraina gjatë natës lanë pas dy të vdekur dhe 17 të plagosur në rajonet Rostov dhe Belgorod. Në qytetin Rostov-on-Don, guvernatori Yury Slyusar konfirmoi se sulmet shkaktuan zjarre në magazina dhe ndërtesa banimi. Në Belgorod, 12 civilë, përfshirë dy fëmijë, pësuan lëndime pas një sulmi masiv. Sipas Ministrisë ruse të Mbrojtjes, forcat e saj shkatërruan 276 dronë ukrainas, ndërsa Shtabi i Përgjithshëm i Ukrainës deklaroi se kishte kapur 123 nga 147 dronët e lëshuar nga Rusia gjatë natës. Për shkak të luftimeve aktive, verifikimi i pavarur i këtyre shifrave mbetet i vështirë.