Ministrja e Ekonomisë, Artane Rizvanolli, mori pjesë në ceremoninë e përurimit të punimeve në katër ndërtesa shumë-banesore sociale në Komunën e Obiliqit dhe të Drenasit. Ngjarja u zhvillua në kuadër të projektit "Zbatimi i Masave të Efiçiencës së Energjisë për Ndërtesat Shumë-Banesore Sociale", të zbatuar nga Fondi i Kosovës për Efiçiencë të Energjisë (FKEE) me përkrahje financiare 90% nga Bashkimi Evropian, bashkëfinancim 10% nga komunat përkatëse dhe mbështetje nga Qeveria e Kosovës.
Rizvanolli theksoi se projekti synon përmirësimin e kushteve të jetesës dhe uljen e kostove të energjisë për familjet përfituese. Në dy ndërtesa sociale në fshatin Plemetin të Obiliqit, investimet rezultuan me ulje të konsumit të energjisë deri në 73%. Ndërkaq, në dy ndërtesa në Drenas, investimi mbi 380 mijë euro përmirësoi kushtet për 50 familje, ose rreth 250 qytetarë, me ulje të konsumit deri në 82%.
Masat e zbatuara përfshijnë:
- izolimin e mureve dhe çatisë;
- ndërrimin e dritareve dhe dyerve;
- instalimin e ndriçimit LED me efikasitet të lartë;
- sistemin e ri të ngrohjes;
- punime për sigurinë dhe funksionalitetin: riparimin e korridoreve, përmirësimin e instalimeve elektrike, sistemin paralel të ujësjellësit, hidroizolimin dhe masat kundër zjarrit.
Në ceremoni morën pjesë ministri për Komunitete dhe Kthim, Nenad Rashiq, përfaqësuesi i Zyrës së Bashkimit Evropian në Kosovë, Alessandro Bianciardi, drejtoresha menaxhuese e FKEE-së, Njomza Hoxha, nënkryetari i Obiliqit, Berat Gashi, dhe kryetari i Drenasit, Ramiz Lladrovci. Aktiviteti theksoi rëndësinë e investimeve në efiçiencë energjie për zhvillim të qëndrueshëm dhe mirëqenie.