Kryeministri në detyrë, Albin Kurti, prezantoi sot ecurinë e projektit “E ardhmja e Energjisë së Gjelbër”, i cili synon përmirësimin e kushteve të jetesës për familjet e cenueshme përmes masave të efiçiencës së energjisë. Projekti realizohet në bashkëpunim me Fondin e Kosovës për Efiçiencë të Energjisë dhe UNDP-në, me mbështetjen financiare të Qeverisë së Danimarkës.
Deri më tani, në kuadër të kësaj iniciative, janë rinovuar 51 shtëpi me një vlerë investimi prej rreth 610 mijë euro. Sipas njoftimit zyrtar, deri në fund të vitit 2026 pritet të përkrahen gjithsej 192 familje, ndërsa numri i përfituesve pritet të arrijë në 280 familje deri në përfundim të programit në vitin 2028. Investimet përfshijnë termoizolimin e fasadave dhe çative, duke synuar uljen e ndjeshme të konsumit të energjisë dhe faturave përkatëse.
Gjatë vizitës në shtëpinë e familjes Dragidella, një nga përfitueset e deritanishme, u raportua se pas ndërhyrjeve konsumi vjetor i energjisë pritet të ulet për rreth 74%, duke zbritur nga mbi 85 megavat-orë në rreth 22 megavat-orë. Ministrja në detyrë e Ekonomisë, Artane Rizvanolli, theksoi se përparësi në këtë program u jepet familjeve që ndodhen në skemën e asistencës sociale, duke u fokusuar veçanërisht te prindërit vetushqyes, personat me aftësi të kufizuara dhe pensionistët. Sipas ministres, ky angazhim pason mbështetjen e mëparshme për më shumë se 3 500 familje të tjera në vend përmes projekteve të ngjashme për izolimin e banesave.