Qindra qytetarë morën pjesë në ceremoninë e përurimit dhe ndriçimit të shkronjave të arta "UÇK" në kodrën e Blinajës, në komunën e Lipjanit. Ky obelisk synon që simboli i Ushtrisë Çlirimtare të Kosovës dhe kujtimi për luftën e saj të jenë të dukshme nga një pjesë e gjerë e territorit përreth.
Besim Jusufi, iniciatori i këtij projekti, theksoi se vendndodhja është përzgjedhur për shkak të rëndësisë historike që ka pasur kjo zonë gjatë luftës së fundit në Kosovë. Sipas tij, Blinaja ka shërbyer si një ndër pozicionet e para të UÇK-së dhe si rrugë kyçe për furnizimin e forcave nga Drenica deri në Deçan.
Realizimi i këtij memoriali u bë i mundur pas një periudhe 3-mujore pune, pavarësisht pengesave të hasura gjatë procesit. Financimi është siguruar nga një mik i Jusufit, ndërsa ndërtimi është mbështetur nga familjarë, miq dhe disa shoqata. Ceremonia u shoqërua me muzikë dhe fjalime nga figura politike e ushtarake, si dhe qytetarë të pranishëm. Obelisqe të ngjashme janë vendosur edhe në vende të tjera të Kosovës.