Inspektorati Policor i Kosovës (IPK) ka filluar hetime ndaj pesë zyrtarëve policorë të Njësisë për Ndërhyrje të Shpejtë në kuadër të Departamentit Kufitar të Policisë së Kosovës.
Bazuar në të dhënat fillestare hetimore dhe provat e siguruara, dyshohet se ata më 13 mars 2026, gjatë ushtrimit të detyrës zyrtare, kanë kryer veprën penale "Përvetësimi në detyrë".
Sipas dyshimeve, zyrtarët policorë, pas sekuestrimit të mbi 100 paketa cigare nga persona të dyshuar për kontrabandë brenda territorit të Kosovës, përvetësuan 24 paketa cigare, që përmbajnë rreth 12.500 pako në vlerë rreth 30.000 euro. Në Doganën e Kosovës dorëzuan vetëm 84 paketa cigare të dyshuara si të kontrabanduara.
Pas veprimeve hetimore, polici Fatmir Uka u arrestua dhe me vendim të Prokurorisë Themelore në Mitrovicë iu caktua masa e ndalimit për 48 orë. Katër zyrtarët e tjerë po hetohen në procedurë të rregullt.
IPK i ka rekomanduar Policisë së Kosovës suspendimin e të pestëve në interes të hetimit dhe për shkak të natyrës së veprës penale që lidhet me keqpërdorimin e detyrës zyrtare dhe integritetin e zyrtarit policor.
Emrat e zyrtarëve policorë të dyshuar janë:
• Arianit Çitaku
• Jeton Ibrahimi
• Kastriot Syla
• Alban Sahiti
• Fatmir Uka
Prokuroria Themelore në Mitrovicë njoftoi se do të paraqesë kërkesë për masën e sigurisë pranë gjykatës kompetente brenda afatit ligjor. IPK siguron se do të trajtojë çdo ankesë për përfshirje të zyrtarëve policorë në vepra penale me profesionalizëm.
Përditësime
IPK kërkon suspendim të përkohshëm 72-orësh ndaj pesë policëve të dyshuar për përvetësimin e 24 paketave cigare (vlerë 30 mijë euro), të sekuestruara gjatë një kontrolli në afërsi të Leposaviqit.
Kallxo siguroi raportin e IPK-së.