Pete Hegseth, Sekretari i Mbrojtjes i SHBA-së, i ka kërkuar Gjenerali Randy George-s, Shefit të Shtabit të Ushtrisë Amerikane, të japë dorëheqjen dhe të dalë në pension menjëherë, sipas burimeve të njohura me vendimin për CBS News.
Një burim tha se Hegseth dëshiron dikë në këtë rol që zbatojë vizionin e Presidentit Trump dhe të vetë Hegseth për Ushtrinë. Një zyrtar i lartë i Departamentit të Mbrojtjes deklaroi: “Jemi mirënjohës për shërbimin e tij, por ishte koha për një ndryshim lidershipi në Ushtri”.
Randy George, oficer këmbësorie karriere dhe i diplomuar në West Point, shërbeu si asistent i lartë ushtarak i Sekretarit Lloyd Austin nga 2021 deri në 2022, gjatë administratës Joe Biden. Ai mori pjesë në Luftën e Parë të Gjirit, si dhe në konfliktet në Irak dhe Afganistan. Nominuar nga Biden dhe konfirmuar nga Senati në 2023, George pritej ta mbante postin deri në 2027, sipas mandatit zakonisht katërvjeçar.
Zëvendësshefi aktual i shtabit, Gjenerali Christopher LaNeve, ndihmës i mëparshëm ushtarak i Hegseth dhe ish-komandant i Divizionit të 82-të Ajror nga 2022 në 2023, ka gjasa të emërohet zëvendësues. Zëdhënësi i Pentagonit Sean Parnell konfirmoi se George “do të dalë në pension nga pozita e tij si Shefi i 41-të i Shtabit të Ushtrisë, me efekt të menjëhershëm”, ndërsa LaNeve do të jetë ushtrues detyre.
Hegseth ka shkarkuar mbi 10 oficerë të lartë, përfshirë Shefin e Shtabit të Përgjithshëm të Forcave të Armatosura Charles Brown dhe Shefen e Operacioneve Detare Lisa Franchetti.
Ky vendim vjen një ditë pas postimit të Hegseth në X, ku anuloi ndëshkimet për ekuipazhin e një helikopteri që fluturoi mbi shtëpinë e këngëtarit Kid Rock në Nashville. Pas njoftimit të Ushtrisë për pezullim pilotësh dhe hetim, Hegseth shkroi: “Asnjë ndëshkim. Asnjë hetim. Vazhdoni përpara, patriotë.”