Peter Schmeichel, ish-portier i Manchester Unitedit, ka deklaruar se klubi anglez duhet ta transferojë mesfushorin shqiptar Granit Xhakën nga Sunderlandi në afatin kalimtar të verës.
Në podkastin "The Good, The Bad & The Football", danezi argumentoi se Unitedit i mungon lidershipi në skuadër, veçanërisht pas largimit të pritshëm të Casemirosë, kontrata e të cilit skadon në fund të sezonit. Schmeichel propozoi ndërtimin e ekipit rreth të riut Kobbie Mainoo, duke sjellë lojtarë si Adam Wharton apo Elliot Anderson, por theksoi nevojën për një lider si Xhaka.
Ai vlerësoi ndikimin e Xhakës te Sunderlandi, ku 33-vjeçari është kapiten dhe ka kontratë deri në verën e 2028-ës. Në 31 paraqitje në Premier League këtë sezon, Xhaka ka shënuar 1 gol dhe ka dhënë 6 asistime. "Ai është arsyeja pse Sunderlandi është aty ku është. Aftësitë e tij si lider janë të shkëlqyera dhe mund të luajë në 80 për qind të ndeshjeve", tha Schmeichel.
Reagimet e legjendave të tjera
Paul Scholes, tjetër legjendë e Unitedit, refuzoi fuqishëm propozimin: "Jo, Pete. E kam shikuar, por ndoshta je në të njëjtën situatë me Casemiron".
Ndërkaq, Nicky Butt mbështeti idenë, duke thënë se Xhaka do të sjellë cilësi liderike në zhveshtare, edhe nëse nuk luan çdo ndeshje: "Ai do t’i sjellë shumë skuadrës".
Deklaratat erdhën në një debat mes legjendave, ku Schmeichel insistoi se Xhaka do të ofronte energji dhe autoritet të rrallë në dhomën e zhveshjes.