Peter Sorensen, Përfaqësuesi i Bashkimit Evropian për Dialogun Kosovë-Serbi, qëndron sot në vizitë zyrtare në Kosovë.
Presidenca e Kosovës ka konfirmuar se presidentja Vjosa Osmani do ta presë Sorensenin në një takim zyrtar në orën 10:00, në Kabinetin e Presidentes. Kjo është bërë e ditur në njoftimin zyrtar të Zyrës së Presidentes.
Pas qëndrimit në Prishtinë, Sorensen pritet të udhëtojë drejt Beogradit, ku do të takohet me përfaqësuesit serbë. Në fokus të diskutimeve të pritshme është çështja e dialogut Kosovë-Serbi.
Vizita e Sorensenit vjen në një periudhë kur Kosova është në pritje të krijimit të institucioneve të reja pas zgjedhjeve të vitit 2025. Viti 2026 do të jetë vit zgjedhor në Serbi.
Përditësime
Peter Sorensen u takua me kryeministrin në detyrë Albin Kurti para takimit me presidenten Vjosa Osmani.
Kjo është vizita e parë e tij pas zgjatjes së mandatit për dy vjet të tjera.
Gjatë mandatit të parë, Sorensen zhvilloi vetëm dy takime me kryenegociatorët kosovarë, pa rezultate konkrete.
Sorensen pritet të takohet edhe me përfaqësues të opozitës kosovare.
Zgjedhjet parlamentare u mbajtën më 28 dhjetor dhe u fituan nga Lëvizja Vetëvendosje.