Në qytetin e Durrësit, më 3 maj, ndodhi një aksident rrugor ku humbën jetën dy fëmijë dhe u plagos rëndë një tjetër. Nikoll Radaçi, 57 vjeç, teksa drejtonte një automjet Mercedes-Benz ML me shpejtësi të lartë dhe në gjendje të dehur, përplasi tre fëmijë të moshave 8, 10 dhe 12 vjeç në zonën e ish-kënetës. Fëmijët 10 dhe 12-vjeç ndërruan jetë në vendngjarje, ndërsa 8-vjeçari u dërgua në spital në gjendje të rëndë.
Drejtuesi i mjetit u largua fillimisht nga vendngjarja, por u arrestua më pas nga policia. Ai kishte histori shkeljesh të mëparshme të rregullave të qarkullimit rrugor, përfshirë parakalime të gabuara dhe tejkalim shpejtësie, si dhe patentë të pezulluar për një muaj. Ndaj tij janë ngritur akuzat për shkelje të rregullave të qarkullimit rrugor me pasojë vdekjen e dy personave dhe drejtim të automjetit në gjendje të dehur.
Si reagim, Skënder Hita, Drejtor i Përgjithshëm i Policisë së Shtetit, urdhëroi pezullimin nga detyra të tre drejtuesve të Policisë Vendore të Durrësit për performancë të dobët në përmbushjen e detyrave:
- Afrim Tafa, Drejtor i Drejtorisë Vendore të Policisë Durrës;
- Zija Sulaj, Kryekomisar dhe Zëvendësdrejtor për Rendin dhe Sigurinë Publike;
- Kreshnik Skëndo, Kryekomisar dhe Shef i Sektorit të Policisë Rrugore.
Pezullimi është deri në përfundim të hetimeve. Në vend të Afrim Tafës është caktuar përkohësisht Ervin Hodaj.
Menjëherë pas ngjarjes, Skënder Hita urdhëroi Drejtorinë e Policisë Rrugore për të ngritur një grup ekspertësh që analizuan shkaqet dhe rrethanat në vendngjarje. Gjithashtu, Drejtoria e Standardeve Profesionale në Drejtorinë e Përgjithshme të Policisë ka nisur një hetim disiplinor për të vlerësuar përgjegjësinë e punonjësve të policisë.
Përditësime
- Gjendja shëndetësore e fëmijës 8-vjeçare është përmirësuar dhe tani është jashtë rrezikut për jetën.
- Nënkryetarja e Kuvendit, Klodiana Spahiu, vizitoi familjet e viktimave për të shprehur ngushëllimet.
Agjencia e Mbikëqyrjes Policore (AMP) ka nisur hetim për shkelje të detyrës dhe favorizim të drejtuesit N.R. (Radaçi) nga policia e Durrësit, lidhur me mosbllokimin e lejes së qarkullimit.
- Radaçi kishte marrë ndëshkim në 2020 për parakalim të gabuar dhe dy pezullime njëmujore në 2022 për tejkalim shpejtësie.
- Aksidenti ndodhi në lagjen nr. 15 të Durrësit.