Agjencia e Mbikëqyrjes Policore (AMP) ka nisur hetimet për veprimet dhe mosveprimet e punonjësve të Policisë së Shtetit në Durrës, pas denoncimeve të banorëve të lagjes 15 në zonën e ish-Kënetës. Qytetarët pretendojnë se policia nuk ka reaguar në kohë ndaj sinjalizimeve të përsëritura për qarkullimin e mjeteve me shpejtësi të lartë në këtë zonë.
Hetimet vijnë pas aksidentit të ndodhur mesditën e së dielës, ku humbën jetën dy të mitur dhe një tjetër mbeti i plagosur. Ngjarja ka ngritur dyshime për reagimin e strukturave policore dhe masat parandaluese, pavarësisht denoncimeve të mëparshme.
AMP do të verifikojë nëse efektivët kanë kryer shkelje të detyrës dhe nëse janë zbatuar procedurat për trajtimin e ankesave të qytetarëve. Nuk përjashtohet mundësia e përgjegjësive ligjore për personat përgjegjës.
Një ditë pas aksidentit, të hënën, kryepolici i Durrësit Skënder Hita pezulloi nga detyra zinxhirin komandues të Policisë së Durrësit deri në përfundim të hetimeve. Shkaktari i aksidentit është 57-vjeçari Nikoll Radaçi, i dyshuar se drejtonte mjetin në gjendje të dehur.