Administrata Tatimore dhe strukturat doganore kanë intensifikuar kontrollet në sektorin e karburanteve në të gjithë vendin. Këto verifikime, të bazuara në analizën e riskut, kanë fokus zbatimin e çmimeve të miratuara nga Bordi i Transparencës dhe formalizimin e tregut të hidrokarbureve.
Nga kontrollet në terren janë evidentuar raste të shitjes së karburantit mbi çmimet e përcaktuara, si dhe shkelje të tjera:
- moslëshimi i faturës tatimore;
- mungesa e listës së çmimeve;
- mungesa e dokumentacionit tatimor;
- mosinstalimi i pajisjeve të fiskalizimit;
- punonjës të padeklaruar.
Në total janë analizuar 13 tatimpagues. Për tre subjekte janë administruar deklarata dhe dokumentacion shtesë, pas së cilave ato janë referuar pranë Bordit të Transparencës për pezullim të përkohshëm të aktivitetit. Pjesa tjetër e subjekteve vazhdon të jetë nën verifikim.
Administrata Tatimore thekson se kontrollet do të vazhdojnë në të gjithë territorin për të garantuar zbatimin e çmimeve të miratuara, mbrojtjen e konsumatorëve dhe formalizimin e tregut të hidrokarbureve. Këto masa synojnë parandalimin e abuzimeve dhe dëmtimin e konsumatorëve.