Administrata Tatimore dhe Administrata Doganore kanë nisur kontrollet në tregun e hidrokarbureve, në zbatim të planit të përbashkët operacional për monitorimin e këtij sektori. Aksioni i parë u zhvillua në Elbasan, në dy subjekte karburanti, ku u identifikuan shkelje të rënda të legjislacionit në fuqi.
Subjektet e kontrolluara, Eida dhe Gega, u monitoruan fillimisht në distancë, bazuar në analizën e riskut dhe informacione të disponueshme. Pas kësaj, inspektorët tatimorë dhe doganorë kryen verifikime në terren. Midis shkeljeve u konstatuan moslëshimi i faturës tatimore, punonjës të padeklaruar, mall pa faturë, mosafishim i listës së çmimeve dhe mospërditësim i të dhënave të biznesit.
Për këto shkelje u vendosën penalitete sipas legjislacionit në fuqi. Gjithashtu, subjekteve u sekuestrua dokumentacion jotatimor, përfshirë 9 blloqe fletë-dalje dhe 9 blloqe mandat-arkëtimi, për verifikime të mëtejshme administrative.
Kontrollet zhvillohen në kuadër të forcës së përbashkët të ngritur nga Ministria e Financave më 11 mars. Kjo forcë do të mbikëqyrë pikët e tregtimit me shumicë dhe pakicë, jo vetëm për çmimet, por edhe për sasitë e hidrokarbureve. Aksionet do të shtrihen në të gjithë territorin e vendit deri më 30 qershor 2026, me qëllim luftën kundër informalitetit, monitorimin e çmimeve dhe garantimin e konkurrencës së ndershme në treg.