Mbrëmjen e së dielës, rreth orës 21:00, në qendër të fshatit Rrilë të Lezhës, persona të paidentifikuar kanë hapur zjarr me armë zjarri ndaj një berberhaneje. Si pasojë e të shtënave mbeti i plagosur Sokol Daci, rreth 30 vjeç, banues në të njëjtin fshat dhe pronar i biznesit.
I plagosuri ndodhej në brendësi të berberhanesë në momentin e ngjarjes, ndërsa aty gjendeshin edhe pesë persona të tjerë. Ai mori tri plagë: një në shpatull, një në bark dhe një në këmbë. Pas ndihmës së parë në Spitalin Rajonal të Lezhës, Sokol Daci u dërgua në Spitalin e Traumës në Tiranë, ku ndodhet nën kujdesin e mjekëve dhe jashtë rrezikut për jetën, në gjendje të qëndrueshme.
Nuk dihet ende nëse Sokol Daci ka qenë shënjestra e ngjarjes apo dikush tjetër. Dyshohet se autorët mund të jenë më shumë se një person, njëri prej tyre ka zbritur nga një automjet dhe ka shtënë drejt biznesit. Sokol Daci, i njohur në zonë si berber Coli, nuk ka precedentë penalë.
Drejtoria Vendore e Policisë Lezhë u njoftua menjëherë dhe dërgoi shërbimet në vendngjarje. Policia ka ngritur pika kontrolli, po kryen krehjen e zonës, analizën e kamerave të sigurisë dhe po merr në pyetje dëshmitarët. Grupi hetimor, nën drejtimin e Prokurorisë, po zhvillon veprime për zbardhjen e rrethanave dhe kapjen e autorëve.
Përditësime
Plumbat shoshin fasadën e berberhanesë në fshatin Rrilë të Lezhës.
Sulmuesi largohet me shpejtësi, duke përfituar nga errësira.
Policia vendos pika kontrolli në hyrje-daljet e Rrilës dhe akset rrugore lidhëse me Lezhën.
Grupi hetimor mbledh gëzhojat, provat materiale dhe sekuestron kamerat e sigurisë.
Policia dyshon se autorët janë tre persona që mbërritën me Audi. Sokol Daci nuk ishte shënjestra kryesore; synohej dikush tjetër brenda berberhanës.
- Një polic i pranishëm deklaroi se nuk i pa autorët.
- Dyshohet se u plagos një anëtar i familjes Nikulaj, por nuk u paraqit në spital.
- Personat brenda kundërpërgjigjën me armë zjarri.
- Berberhanja nuk ka kamera sigurie; po kontrollohen kamerat e bizneseve përreth.
Autorët, të veshur me kamuflazhe dhe kapuçe, u larguan drejt rrugës së Shën Kollit.