Një ngjarje kriminale është regjistruar pasditen e së martës, më 8 shtator 2026, në qytetin e Krumës, në rrethin e Hasit. Sipas njoftimit zyrtar të Policisë, një 29-vjeçar me inicialet J. A., banues në Krumë, ka mbetur i plagosur në këmbë si pasojë e të shtënave me armë zjarri. Ngjarja ka ndodhur rreth orës 17:10, në vendin e njohur si Kryqezi i Spitalit.
Nga të dhënat paraprake, dyshohet se plagosja ka ndodhur gjatë një konflikti për motive të dobëta midis të riut dhe autorit të dyshuar. Pas incidentit, autori, i identifikuar nga shërbimet e Policisë si shtetasi F. D., rreth 30 vjeç, është larguar nga vendngjarja. Forcat e rendit janë vënë menjëherë në ndjekje të tij me qëllim kapjen dhe vënien para përgjegjësisë ligjore.
Grupi hetimor, nën drejtimin e Prokurorisë, po vijon veprimet procedurale në vendin e ngjarjes për të zbardhur rrethanat e plota dhe për të dokumentuar ligjërisht rastin. Policia po punon për të sqaruar dinamikën e konfliktit që çoi në përdorimin e armës së zjarrit.
Përditësime
Autori i dyshuar, Fatjon Dauti, është vetëdorëzuar në polici pas ngjarjes së ndodhur më 8 shtator në Krumë. Gjatë dorëzimit, Dauti ka dorëzuar edhe armën e krimit. Në vijim të hetimeve, Policia zhvilloi një kontroll në banesën e autorit ku gjeti dhe sekuestroi një kallashnikov, dylbi, jelek antiplumb dhe sasi municioni. Viktimë e plagosjes mbeti shtetasi Jakup Aga, i cili po merr ndihmën e nevojshme mjekësore.