Ndeshja e javës në Serie A ndërmjet Interit dhe Napolit, e luajtur të dielën mbrëma, përfundoi me rezultat 2:2. Ky barazim u shoqërua me polemika të mëdha për penalltinë e dhënë në favor të zikaltërve, e cila u shndërrua në gol nga Hakan Çalhanoglu.
Penalltia u shkaktua nga një ndërhyrje e mbrojtësit të Napolit, Amir Rrahmani, ndaj mesfushorit të Interit, Henrikh Mkhitaryan. Ish-arbitri italian Andrea De Marko analizoi situatën në emisionin Oper VAR dhe konfirmoi se vendimi për penallti ishte i saktë. Ai shpjegoi se ndërhyrja e Rahmanit ishte një hap i qartë në këmbë, që prek Mkhitaryanin, i cili nuk mund ta shmangë kontaktin. De Marko theksoi se arbitri në fushë, ndoshta për shkak të shpejtësisë së veprimit, nuk e pa inicialisht, por dhoma e VAR-it bëri një punë të mirë duke rikthyer vendimin në shqyrtim.
Sipas De Markos, ndërhyrja e Rahmanit ishte e pamatur dhe mbrojtësi kosovar meritonte një karton të verdhë, i cili nuk u dha. Kjo situatë u diskutua gjerësisht në mediat italiane, ku u publikua edhe dialogu ndërmjet arbitrit dhe dhomës së VAR-it. Arbitri raportohet të ketë thënë: "Po e kontrolloj... Prit, sepse ka një këmbë që shkelet... 13-shja duke shkelur me këmbë. 13, numri 13", duke iu referuar fanellës së Rahmanit te Napoli.
Trajneri i Napolit, Antonio Conte, nuk u pajtua me vendimin dhe protestoi ashpër, çka çoi në përjashtimin e tij me karton të kuq. Këto debate theksojnë rolin e teknologjisë VAR në Serie A për raste të tilla të diskutueshme.