Mbrëmjen e së mërkurës, rreth orës 20:40, hetuesit e Drejtorisë së Hetimit të Trafikimit me Narkotik në Prizren, të asistuar nga njësitë e Stacionit Policor të Prizrenit, kanë zbatuar një urdhëresë për kontroll të befasishëm në një lokal-kafiteri në pronësi të dy vëllezërve. Urdhëresa për këtë kontroll ishte lëshuar nga Gjykata Themelore në Prizren.
Operacioni është ndërmarrë mbi bazën e dyshimeve për përfshirjen e pronarëve në aktivitete të paligjshme, konkretisht shpërndarje të narkotikëve dhe mbajtje të armëve të zjarrit. Gjatë kontrollit, autoritetet policore nuk kanë gjetur lëndë narkotike, por kanë sekuestruar një pistoletë të tipit SIG së bashku me 9 fishekë.
I dyshuari D.P., 29 vjeç, i cili ndodhej në vendngjarje, është shoqëruar për intervistim në lidhje me veprën penale "Mbajtja në pronësi, kontroll ose posedim të paautorizuar të armëve", sipas neneve 267 dhe 366 të Kodit Penal të Republikës së Kosovës. Me urdhër të prokurorit të çështjes, i dyshuari është liruar dhe rasti po vijon në procedurë të rregullt.