Policia britanike kontrollon dy pronat e Peter Mandelson për shkelje të detyrës publike

Policia britanike ka kryer kontrolle në dy prona të Peter Mandelson, ish-zyrtar i lartë qeveritar dhe ish-ambasador i Mbretërisë së Bashkuar në SHBA. Kontrollet u zhvilluan në banesën e tij në Camden, veri i Londrës, ku u sekuestruan disa kuti me materiale, dhe në një pronë tjetër në Wiltshire, ku u vendos monitorim me forca të shumta policore.

Zëvendëskomisionerja e Policisë Metropolitane, Hayley Sewart, konfirmoi se operacionin e kryen "ekipi i specializuar për krimet qendrore". Ajo sqaroi se hetimi shqyrton pretendime për shkelje të detyrës publike. "Ai nuk është arrestuar dhe hetimet vijojnë", deklaroi ajo.

Hetimi vjen pas publikimit të dosjeve të Jeffrey Epstein, të cilat zbulojnë detaje të reja mbi marrëdhënien mes Mandelson dhe financierit amerikan. Sipas këtyre dokumenteve, Mandelson, 72 vjeç, dyshohet se ka ndarë informacione të ndjeshme me Epstein pas krizës financiare të vitit 2008. Midis tyre përmenden email-e ku diskutohet një taksë e njëhershme mbi bonuset e bankierëve dhe një paketë prej 500 miliardë eurosh nga Bashkimi Evropian për shpëtimin e euros. Mandelson ka mohuar çdo akuzë, ka shprehur keqardhje për mbajtjen e kontakteve dhe ka kërkuar falje viktimave të Epstein.

Presioni mbi qeverinë

Çështja ka vënë nën presion kryeministrin dhe kryetarin e Partisë Laburiste, Keir Starmer. Ai deklaroi se Mandelson kishte gënjyer për miqësinë me Epstein para emërimit si ambasador në Uashington, post nga i cili u shkarkua në shtator. Në një letër drejtuar Komitetit të Inteligjencës dhe Sigurisë së Parlamentit (ISC), Starmer njoftoi dëshirën për publikim sa më të shpejtë të dokumenteve të vlerësimit. Megjithatë, një sasi e konsiderueshme materiale, përfshirë mijëra faqe, po shqyrtohet për të mbrojtur sigurinë kombëtare dhe marrëdhëniet ndërkombëtare. Zyrtarët qeveritarë bashkëpunojnë me policinë për të shmangur ndikimin në hetim.