Aksioni kundër trafikimit të armëve në Prishtinë
Policia e Kosovës, në bashkëpunim me Prokurorinë Themelore në Prishtinë dhe Doganën e Kosovës, ka realizuar një aksion kundër trafikimit të armëve. Operacioni nisi pasi Dogana ndaloi një automjet me targa të Serbisë, në të cilin, brenda një bunkeri të improvizuar, u gjet municion. Në vijim të hetimeve, janë kontrolluar katër lokacione të ndryshme në rajonin e Prishtinës.
Në cilësinë e provave materiale janë konfiskuar:
• 6 armë zjarri (4 të shkurta dhe 2 të gjata).
• 8,919 fishekë të kalibrave të ndryshëm.
• 1 shurdhues për armë.
• 3,470 euro para të gatshme.
• Një automjet i përdorur për veprën penale.
Sipas informacioneve të siguruara, personat e ndaluar për 48 orë në këtë rast janë Fejza Hasani (58 vjeç), Ismet Jupolli (63 vjeç) dhe Artan Jupolli (33 vjeç). Dyshohet se një pjesë e municionit, konkretisht 2,550 fishekë të kalibrit 9 mm, ishin kontrabanduar nga Serbia në automjetin e drejtuar nga Fejza Hasani, ndërsa pjesa tjetër e arsenalit u gjet gjatë bastisjeve në pronat e Ismet Jupollit.
Arrestimi në Obiliq
Në një rast tjetër, Policia e Kosovës ka arrestuar një 22-vjeçar në qytetin e Obiliqit, i identifikuar me inicialet Sh.P. Arrestimi ka ndodhur pas raportimit për një rast kanosjeje në rrugën "Fejzullah Preniqi". Gjatë ndërhyrjes së hetuesve policorë, të dyshuarit i është gjetur dhe sekuestruar një armë e tipit AK-47. Me vendim të prokurorit, ai është dërguar në mbajtje për 48 orë, nën dyshimin për veprat penale "Kanosje" dhe "Mbajtja në pronësi, kontroll ose posedim të paautorizuar të armës".