Policia e Kosovës ka realizuar një operacion të gjerë në rajonin e Prishtinës, pas hetimeve të gjata dhe bashkëpunimit me Doganën e Kosovës dhe Prokurorinë Themelore në Prishtinë. Aksioni nisi pasi autoritetet doganore ndaluan një automjet me targa të Serbisë, ku u zbulua municion i kalibrit 9 mm i fshehur në një bunker të improvizuar.
Në vijim të zbulimit, njësitet e Departamentit për Kufi ushtruan kontrolle në katër lokacione të ndryshme. Gjatë këtij operacioni u gjetën dhe u sekuestruan provat e mëposhtme materiale:
• 6 armë zjarri (katër të shkurta dhe dy të gjata);
• 8 mijë e 919 fishekë të kalibrave të ndryshëm;
• 1 shurdhues për armë zjarri;
• 3 mijë e 470 euro para të gatshme;
• 1 automjet i përdorur për kryerjen e veprimtarisë së paligjshme.
Në lidhje me këtë rast, policia shoqëroi për intervistim gjashtë persona, të cilët u morën në pyetje në prani të avokatëve mbrojtës. Në përfundim të procedurave, prokurori i çështjes vendosi masën e ndalimit prej 48 orësh për tre prej të dyshuarve. Autoritetet bënë të ditur se hetimet vazhdojnë për të zbardhur plotësisht veprimtarinë kriminale dhe për të parandaluar trafikimin e armëve të zjarrit.