Drejtori i Përgjithshëm i Policisë së Shtetit, Skënder Hita, ka zhvilluar një takim zyrtar me delegacionin e lartë të Guardia di Finanza-s, të kryesuar nga Komandanti i Operacioneve Ajrore Detare, Gjeneral Divizioni Joselito Minuto. Takimi u fokusua në forcimin e partneritetit strategjik midis dy institucioneve në fushën e monitorimit ajror të territorit.
Gjatë diskutimeve, Drejtuesi Madhor Skënder Hita vlerësoi bashkëpunimin afatgjatë me autoritetet italiane, duke e cilësuar atë si një model të konsoliduar besimi dhe miqësie që ka tejkaluar marrëdhëniet formale institucionale. Ai theksoi se ky partneritet ka sjellë rezultate konkrete në luftën kundër kultivimit të bimëve narkotike, falë shkëmbimit të informacionit dhe operacioneve të përbashkëta të vëzhgimit.
Nga ana e tij, Gjeneral Divizioni Joselito Minuto rikonfirmoi angazhimin e Guardia di Finanza-s për të rritur intensitetin e monitorimit ajror në Shqipëri. Planifikimi për periudhën në vijim parasheh këto masa:
• Shtimin e numrit të fluturimeve të vëzhgimit mbi territorin shqiptar;
• Verifikimin e detajuar të çdo koordinate që raportohet si zonë me risk për kultivimin e bimëve narkotike;
• Koordinim të vazhdueshëm për përballimin e sfidave të përbashkëta të sigurisë.
Në këtë takim, krahas drejtuesve kryesorë, morën pjesë edhe përfaqësues të tjerë të lartë të Policisë së Shtetit, të cilët riafirmuan rëndësinë e bashkëpunimit dypalësh në parandalimin e çdo tentative për kultivim të paligjshëm, si dhe në goditjen e trafikut të lëndëve narkotike në rajon.