Drejtori i Përgjithshëm i Policisë së Shtetit, Skënder Hita, priti në një takim zyrtar ambasadorin e Spanjës në Tiranë, Gabriel Cremades Ventura, i cili shoqërohej nga përfaqësues të Ministrisë së Brendshme spanjolle dhe oficerë ndërlidhës. Diskutimet u fokusuan në forcimin e partneritetit strategjik në fushën e sigurisë dhe luftën kundër krimit të organizuar.
Palët vlerësuan mekanizmat e deritanishëm, duke përmendur operacionin "Nomada" dhe Skuadrën e Përbashkët Hetimore, të cilët kanë prodhuar rezultate konkrete në ndalimin e trafikimit të narkotikëve, armëve të zjarrit dhe luftën kundër lëvizjes së paligjshme të emigrantëve.
Drejtori Hita konfirmoi vendosmërinë e institucionit për të shtuar numrin e operacioneve të përbashkëta dhe për të zgjeruar shkëmbimin e informacionit në kohë reale. Një tjetër pikë kyçe e takimit ishte bashkëpunimi në nivel edukativ, ku u ra dakord për lidhje më të ngushta midis Akademisë së Sigurisë në Tiranë dhe Shkollës Kombëtare të Policisë së Spanjës. Ky partneritet synon modernizimin e kurrikulave dhe trajnimin e efektivëve të rinj me metoda bashkëkohore.
Ambasadori Ventura vlerësoi Policinë e Shtetit si një partner të besueshëm në rajon dhe konfirmoi gatishmërinë e autoriteteve spanjolle për të zgjeruar bashkëpunimin në fusha të tjera, me synim garantimin e sigurisë së qytetarëve.