Gjatë 24 orëve të fundit, Policia e Tiranës ka përfunduar dy operacione të koduara, të cilat kanë çuar në zbardhjen e 6 rasteve të vjedhjes së pronës dhe pasurisë.
Në kuadër të operacionit të koduar “HIJA”, shërbimet e Komisariatit të Policisë Nr. 1 vunë në pranga shtetasin K. M., 23 vjeç. Sipas njoftimit zyrtar, i riu akuzohet se gjatë periudhës 14–22 gusht 2026 ka vjedhur para dhe produkte në 5 subjekte të ndryshme tregtare. Nga verifikimet rezultoi se shtetasi ishte nën masën e sigurisë “Arrest në shtëpi” për veprimtari të ngjashme kriminale. Gjatë arrestimit në sheshin “Skënderbej”, policia i gjeti dhe i sekuestroi gjithashtu një sasi lënde të dyshuar narkotike cannabis sativa.
Ndërkohë, operacioni i koduar “REACTION”, i finalizuar nga shërbimet e Komisariatit të Policisë Nr. 4, solli arrestimin e 31-vjeçarit Sh. J., i cili dyshohet se ka vjedhur me dhunë dy varëse një shtetaseje në rrugën e “Saraçëve”. Dy varëset e vjedhura janë sekuestruar nga policia në cilësinë e provës materiale.
Materialet procedurale për të dyja rastet i janë referuar Prokurorisë së Tiranës për kryerjen e veprimeve të mëtejshme hetimore.