Autoritetet policore në Ulqin kanë ndaluar tre shtetas të Kosovës me inicialet H.Q. (48), B.G. (50) dhe E.K. (28), të cilët dyshohen për përfshirje në disa vjedhje të kryera në territorin e kësaj komune. Aksioni policor është zhvilluar në zonën e Plazhit të Madh me qëllim parandalimin e veprave penale kundër pasurisë.
Gjatë kontrollit të kryer në një automjet të tipit Audi A5 me targa të Polonisë, policia ka gjetur një pajisje elektronike të specializuar për hapjen e automjeteve pa autorizim, si dhe mjete të tjera që dyshohet se janë përdorur për kryerjen e veprave penale. Përveç mjeteve të punës, policia ka sekuestruar edhe një sasi parash të gatshme në vlerë prej 3,785 euro dhe 960 marka konvertibile.
Sipas njoftimit zyrtar të Policisë së Malit të Zi, dyshohet se këto mjete monetare rrjedhin nga vjedhjet e kryera në zonën e plazheve të Ulqinit. Të dyshuarit janë shoqëruar në ambientet e Departamentit të Sigurisë në Ulqin, ku kanë nisur procedurat ligjore për zbardhjen e plotë të rastit. Hetimet në lidhje me rastin janë duke vazhduar për të përcaktuar shtrirjen e plotë të aktiviteteve kriminale të personave të ndaluar.