Strukturat e Policisë së Vlorës kanë nisur një aksion të gjerë kontrolli në të gjithë territorin e qytetit, pas vendimit për ashpërsimin e masave ndaj drejtuesve të automjeteve që parkojnë në mënyrë të dyfishtë ose në hapësira që cenojnë qarkullimin dhe hapësirën publike.
Në terren kanë zbritur Drejtoria Vendore e Policisë, Forcat "Shqiponja", Policia e Qarkullimit Rrugor dhe shërbimet e rendit, duke zhvilluar kontrolle të përqendruara në zonat më problematike.
Fokusi ka qenë në akset kryesore, rrugët e brendshme me fluks të lartë lëvizjeje, pranë institucioneve publike, shkollave, spitaleve dhe zonave tregtare, ku parkimi i paligjshëm ka krijuar bllokime, vështirësi për këmbësorët dhe rrezik për sigurinë rrugore.
Gjatë ditëve të para të aksionit janë vendosur me qindra gjoba ndaj drejtuesve që kanë shkelur rregullat, ndërsa një numër i konsiderueshëm mjetesh janë bllokuar dhe larguar me karrotrec nga vendet e ndaluara. Policia ka rikthyer në funksion të plotë karrotrecin si masë për të disiplinuar parkimin e paligjshëm, veçanërisht kur automjetet kanë bllokuar korsitë e lëvizjes, hyrje-daljet e banesave apo bizneseve, trotuaret dhe hapësirat e dedikuara për persona me aftësi të kufizuar.
Autoritetet kanë deklaruar zero tolerancë ndaj këtyre shkeljeve, pasi ato ndikojnë në cilësinë e jetës urbane dhe funksionimin normal të qytetit. Aksioni do të vazhdojë çdo ditë me patrullime të shtuar dhe kontrolle të befasishme në zona të ndryshme.
Për drejtuesit e automjeteve që përsërisin shkeljet parashikohen masa më të ashpra administrative, përfshirë gjoba më të larta dhe procedura shtesë sipas legjislacionit në fuqi.
Autoritetet u bëjnë thirrje qytetarëve të respektojnë rregullat e qarkullimit dhe të shmangin parkimin në kundërshtim me ligjin, duke theksuar se respektimi i hapësirës publike është përgjegjësi e përbashkët. Synimi është rikthimi i disiplinës në rrugë, lehtësimi i trafikut dhe garantimi i sigurisë për drejtuesit e mjeteve, këmbësorët dhe bizneset.