Policia e Vlorës ka zhvilluar mbrëmjen e 27 shkurtit një aksion të befasishëm në hyrje të qytetit bregdetar, me qëllim kapjen e personave të shpallur në kërkim.
Operacioni është përqendruar në segmentin hyrës, ku janë ndaluar dhe verifikuar automjetet që vinin nga autostrada Fier–Vlorë. Në terren kanë qenë të pranishme Forcat Shqiponja, patrullat e rendit dhe Policia Rrugore, të cilat kanë ushtruar kontrolle ndaj drejtuesve të mjeteve.
Burime nga vendngjarja bëjnë me dije se aksioni synon jo vetëm kapjen e personave në kërkim, por edhe parandalimin e mbajtjes së mjeteve të paligjshme apo lëndëve të ndaluara. Disa automjete të dyshimta janë ndaluar për verifikim.
Ende nuk ka një reagim zyrtar nga policia mbi këto kontrolle, ndërsa aksioni vazhdon në terren.