Pesë trupa të pajetë foshnjash janë gjetur në një banesë në qytetin Orange, në jug të Francës. Ngjarja u zbulua pasi një grua, e lindur në vitin 1994, solli në jetë një fëmijë të shëndetshëm mbrëmjen e së hënës. Sipas mediave lokale, kjo ishte hera e tretë që gruaja mohonte shtatzëninë.
Sipas raportimeve të gazetës Le Parisien, pas lindjes së fëmijës në spitalin e Orange, bashkëshorti i gruas, i cili fillimisht nuk ishte në dijeni të situatës, kreu një kontroll në banesë pas një grindjeje. Ai zbuloi një trup në dekompozim dhe e dërgoi atë në spital, duke shkaktuar ndërhyrjen e menjëhershme të autoriteteve sipas Nenit 40. Policia gjyqësore e Avignonit kreu më pas një kontroll të plotë në banesën e çiftit.
Hetuesit gjetën mbetje të tjera njerëzore të vendosura brenda kutive të kartonit dhe qeseve plastike. Çifti, për të cilin nuk rezulton të ketë pasur probleme të mëparshme, është prind i dy fëmijëve të tjerë, të moshës 8 dhe 12 vjeç. Burri raportohet se është punonjës, ndërsa gruaja është shtëpiake. Gruaja mbetet në spital nën kujdes mjekësor dhe nuk është marrë në paraburgim, ndërsa Prokuroria e Carpentras vazhdon hetimet për zbardhjen e plotë të rrethanave.
Kjo ngjarje ka tronditur opinionin publik në Francë, duke rikthyer në vëmendje një rast të ngjashëm të ndodhur në muajin mars të këtij viti në fshatin Bédoin, ku një grua u dënua me 25 vite burg pasi trupat e dy foshnjave u gjetën në frigoriferin e banesës së saj.