Gjatë një operacioni të gjerë kundër kultivimit të bimëve narkotike në qarkun e Shkodrës, forcat policore kanë ndërhyrë në fshatrat Ndrejaj dhe Vukël. Aksioni është ndërmarrë në kuadër të operacionit të koduar "Territor i Pastër".
Në fshatin Ndrejaj, njësia administrative Shosh, policia ka zbuluar 768 bimë kanabis dhe 80 kubikë me fidanë. Në flagrancë është arrestuar Pllumb Mollzati, 53 vjeç, i cili akuzohet si kultivuesi i kësaj parcele.
Në fshatin Vukël, njësia administrative Kelmend, janë konstatuar 1250 bimë kanabis. Në afërsi të kësaj parcele është arrestuar Ardjan Çekaj, 52 vjeç, nën akuzën e veprës penale "Moskallëzimi i krimit". Për të njëjtën zonë, autoritetet kanë nisur procedimin penal në gjendje të lirë ndaj kryeplakut të fshatit, K. B., 65 vjeç.
Të gjitha bimët dhe fidanët e gjetur janë asgjësuar përmes djegies. Materialet procedurale i janë referuar Prokurorisë pranë Gjykatës së Shkallës së Parë të Juridiksionit të Përgjithshëm Shkodër për hetime të mëtejshme. Policia njofton se kontrollet në territor do të vijojnë me intensitet për parandalimin e veprimtarive të ngjashme kriminale.