Policia e Shkodrës ka zbuluar një tunel të përshtatur për kultivimin e bimëve narkotike kanabis në oborrin e një banese të marrë me qira në lagjen “10 Korriku” të Shkodrës. Ngjarja ndodhi në kuadër të operacionit policor të koduar “Neonët 9”, pjesë e operacionit më të gjerë “Neonët”, ku ky është rasti i 14-të i goditur.
Tuneli furnizohej me energji elektrike përmes një lidhjeje të paligjshme. Gjatë kontrollit u sekuestruan 670 fidanë dhe bimë të dyshuara narkotike kanabis, konkretisht 555 fidanë dhe 115 bimë, si dhe 254 pajisje elektrike, midis të cilave:
• 126 llamba;
• 80 pajisje inverter;
• 31 panele LED;
• 17 filtra ajri.
Këto pajisje shërbenin për kultivimin dhe tharjen e bimëve narkotike. Operacioni u zhvillua nga strukturat e specializuara të Drejtorisë Vendore të Policisë Shkodër, në bashkëpunim me Komisariatin e Policisë Shkodër dhe Forcën e Posaçme “Shqiponja”, bazuar në informacione operative.
Në flagrancë u arrestuan dy autorët e dyshuar:
• Arvid Papajanis (A. P.), 35 vjeç, banues në Shkodër;
• Klodian Hasanaj (K. H.), 30 vjeç, banues në fshatin Degë, Tropojë.
Gjithashtu u arrestua punonjësi i OSHEE-së Dritan Selmani (D. S.), 40 vjeç, banues në Shkodër. Tre punonjës të tjerë të OSHEE-së po hetohen në gjendje të lirë për veprën penale të “shpërdorimit të detyrës”, kryer në bashkëpunim:
• D. P., 32 vjeç;
• M. H., 35 vjeç;
• F. V., 23 vjeç.
Materialet procedurale i janë kaluar Prokurorisë së Shkodrës për veprime të mëtejshme. Policia vijon punën për dokumentimin e plotë të veprimtarisë kriminale.