Policia e Shkodrës ka finalizuar operacionin Neonët 8 në Malësi të Madhe, ku ka zbuluar tre ambiente të përshtatura për kultivimin e bimëve narkotike kanabis në fshatin Boriç i Madh.
Gjatë kontrollit u arrestua në flagrancë shtetasi Kol Narkaj, 35-vjeçar, banues në fshatin Bratosh, i dyshuar për kultivimin e drogës në një banesë dhe dy stalla. Është shpallur në kërkim shtetasi A. G., 36-vjeçar, banues në fshatin Vrakë.
Të dyshuarit përdornin pajisje elektrike të furnizuara me lidhje të paligjshme energjie elektrike. Për shpërdorim detyre u ndaluan katër punonjës të OSHEE-së:
• Valentin Kuvendaj, 27 vjeç, banues në fshatin Breg Lumi;
• Xhuljano Ceraj, 24 vjeç, banues në Zagorë;
• Faik Muselaj, 63 vjeç, banues në fshatin Rashkullaj;
• Fatmir Kajoshaj, 58 vjeç, banues në Shkodër.
Një punonjës tjetër i OSHEE-së procedohet penalisht në gjendje të lirë.
Nga kontrollet u sekuestruan:
• 771 bimë të dyshuara narkotike kanabis;
• 6 kg e 250 gr material bimor të dyshuar kanabis;
• 195 llamba;
• 21 aspiratorë;
• 20 filtra ajri.
Operacioni u zhvillua nga strukturat e specializuara të Drejtorisë Vendore të Policisë Shkodër, në bashkëpunim me Komisariatin e Policisë Malësi e Madhe dhe Forcat e Posaçme Shqiponjat. Ky është rasti i 13-ët i goditur në kuadër të operacionit Neonët. Materialet iu kaluan Prokurorisë së Shkodrës.
Përditësime
- A.S., 57 vjeç, punonjës i sektorit të pestë të OSHEE-së, procedohet penalisht në gjendje të lirë.
- IndeksOnline ka publikuar pamje video nga operacioni policor.
Policia e Shtetit arrestoi Arben Gjergjin (57) dhe Arnold Gjergjin (22), babë e bir, në fshatin Rrilë të Lezhës, në kuadër të operacionit "Second floor" për kultivim kanabisi.
Gjithashtu u arrestua punonjësi i OSHEE-së, Gjon Doda (59). Katër punonjës të tjerë të OSHEE-së janë në hetim: M.P., A.Gj., E.R., O.T..
U sekuestruan 8,8 kg kanabis i tharë, 1.064 bimë, 960 fidanë, 850 fara, 106 llamba, 180 g kokainë, 5 armë zjarri dhe sportive, si dhe automjete e telefona celularë.