Shërbimet e Komisariatit të Policisë Malësi e Madhe finalizuan me sukses operacionin policor të koduar Flagranca, i cili kishte për qëllim goditjen e kultivimit të bimëve narkotike. Si rezultat i hetimeve intensive dhe përdorimit të metodave proaktive, efektivët lokalizuan një parcelë me bimë të dyshuara narkotike në territorin e fshatit Ivanaj.
Gjatë kontrollit në terren, policia gjeti të mbjella 306 bimë të llojit Cannabis Sativa. Në përputhje me procedurat ligjore, bimët u asgjësuan në vendngjarje nëpërmjet djegies.
Në vendin ku ishin kultivuar bimët, shërbimet e rendit arrestuan në flagrancë dy shtetas:
• Nikoll Zabelaj, 40 vjeç, banues në fshatin Guci e Re.
• Kin Plepi, 43 vjeç, banues në fshatin Grudë e Re.
Të dy personat akuzohen si autorë të kultivimit të bimëve. Materialet procedurale i janë referuar Prokurorisë pranë Gjykatës së Shkallës së Parë të Juridiksionit të Përgjithshëm Shkodër për hetime të mëtejshme. Policia njoftoi se kontrollet në të gjithë territorin e qarkut Shkodër do të vijojnë për parandalimin dhe goditjen e veprimtarive të kësaj natyre.