Gjatë një operacioni të gjerë në qarkun e Lezhës, shërbimet e Komisariatit të Policisë Mirditë, Komisariatit të Policisë Kurbin dhe Seksionit për Hetimin e Narkotikëve pranë DVP Lezhë, goditën tri raste të kultivimit të bimëve narkotike. Operacioni u finalizua pas kontrolleve intensive në terren, të mbështetura nga vëzhgimi ajror me dronë dhe informacionet e siguruara në rrugë operative.
Si rezultat i këtyre veprimeve, policia vuri në pranga tre shtetas:
• Jetmit Rrucaj, 21 vjeç, banues në Durrës, i cili u kap në fshatin Sheshaj, Mirditë, duke u kujdesur për 222 bimë kanabis.
• Dritan Nikolli, 47 vjeç, banues në Fshat Laç, Kurbin, i cili u kap duke u kujdesur për 151 bimë kanabis.
• Vojsava Mercina, 44 vjeçe, e cila u arrestua në lagjen “Rrahu i Pashës” në Laç, pasi aty u gjetën 63 bimë të dyshuara narkotike.
Të gjitha bimët e konstatuara, gjithsej 436 rrënjë, u asgjësuan në vend përmes djegies. Materialet procedurale i janë referuar Prokurorisë pranë Gjykatës së Shkallës së Parë të Juridiksionit të Përgjithshëm Lezhë, për hetime të mëtejshme mbi përgjegjësitë ligjore të personave të arrestuar.