Shërbimet e Komisariatit të Policisë Kurbin finalizuan me sukses operacionin policor të koduar "Vigjilenca 3", në kuadër të përpjekjeve për goditjen e kultivimit të bimëve narkotike në qarkun e Lezhës.
Gjatë kontrollit në territorin e fshatit Skuraj, forcat e rendit zbuluan një parcelë me rreth 50 bimë të dyshuara si Cannabis Sativa. Bimët u asgjësuan menjëherë nëpërmjet djegies, ndërsa në vendngjarje u kapën në flagrancë dy të dyshuarit, Alfons Halili dhe Seldi Tafa, banues në Fushë Milot.
Në cilësinë e provës materiale, përveç bimëve narkotike, policia sekuestroi një automjet dhe sende të tjera që do t'i shërbejnë hetimit për zbardhjen e plotë të kësaj veprimtarie kriminale. Materialet procedurale i janë referuar Prokurorisë pranë Gjykatës së Shkallës së Parë të Juridiksionit të Përgjithshëm Lezhë për veprime të mëtejshme.
Policia njofton se kontrollet antikanabis do të vijojnë intensivisht në të gjithë territorin e qarkut. Sqarim: Çdo person prezumohet i pafajshëm deri sa nuk vërtetohet fajësia e tij me vendim gjyqësor të formës së prerë.