Policia e Komisariatit të Vaut të Dejës zhvilloi operacionin e koduar "Monitorimi" për goditjen e veprimtarisë kriminale në fushën e narkotikëve. Pas kontrolleve intensive dhe hetimeve me metoda proaktive, në fshatin Kroni i Madh u zbulua një parcelë me bimë të dyshuara Cannabis Sativa.
Në pranga janë vënë vëlla e motër, të cilët akuzohen për kultivimin e bimëve narkotike: Pal Pepaj, 33 vjeç, dhe Agetina Pepaj, 43 vjeçe, banues në zonë. Një pjesë e bimëve u asgjësua nëpërmjet djegies, ndërsa një sasi tjetër u sekuestrua në cilësinë e provës materiale.
Krahas arrestimeve, policia ka proceduar në gjendje të lirë për veprën penale "Shpërdorimi i detyrës" dy zyrtarë lokalë, të cilët dyshohet se nuk kanë raportuar aktivitetin kriminal:
- D. D., 51 vjeç, kryeplak i fshatit Kroni i Madh;
- N. G., 56 vjeç, vrojtues pyjesh.
Materialet procedurale i janë referuar Prokurorisë pranë Gjykatës së Shkallës së Parë të Juridiksionit të Përgjithshëm Shkodër. Policia theksoi se kontrollet për parandalimin dhe goditjen e kultivimit të lëndëve narkotike do të vijojnë në të gjithë territorin e qarkut Shkodër.