Operacioni antidrogë u ndërmor pas një hetimi disajavor nga specialistët e Seksionit për Hetimin e Narkotikëve, në bashkëpunim me shërbimet e Komisariatit të Policisë Lezhë dhe Forcën e Posaçme Shqiponja. Në fshatin Velë, njësia administrative Kolsh, u identifikuan ambiente të mbyllura dhe të hapura të përshtatura për kultivimin e bimëve narkotike të llojit Cannabis Sativa.
Nga totali i 174 bimëve të asgjësuara, 119 bimë ishin kultivuar në ambiente të mbyllura brenda një banese, duke përdorur llamba dhe pajisje të tjera elektrike të lidhura në mënyrë të paligjshme me rrjetin e energjisë. Dy ambiente të tjera brenda të njëjtës ndërtesë ishin përgatitur për vijimin e aktivitetit kriminal. Gjithashtu, në afërsi të banesës u zbuluan 2 parcela të hapura me 55 bimë të tjera narkotike.
Në cilësinë e provës materiale, policia sekuestroi:
• 2 armë gjahu
• 1 automjet
• 18 celularë
• Pajisje elektrike që shërbenin për kultivimin e bimëve
Në vijim të hetimeve, materiali procedurial i është referuar Prokurorisë së Lezhës. Procedimi penal ka nisur për katër punonjës të OSHEE-së (J. Gj., F. M., N. G. dhe B. N.), të cilët akuzohen për shpërdorim të detyrës dhe korrupsion pasiv, pasi dyshohet se kanë favorizuar lidhjet e paligjshme të energjisë elektrike. Policia po vijon hetimet për të identifikuar persona të tjerë të përfshirë në këtë veprimtari.
Përditësime
Policia ka identifikuar dy të arrestuarit e operacionit 'Lightning' në Lezhë: Marin Feta, 39 vjeç, banues në Velë, dhe Anton Mashnori, 27 vjeç, banues në Ishull Shëngjin. Gjatë kontrolleve në banesën e 27-vjeçarit u gjetën 16 celularë të tjerë, duke e çuar numrin e pajisjeve të sekuestruara në 34. Hetimet konfirmuan se të arrestuarit e tjerë, punonjës të OSHEE-së, mbanin pozicionet e shefit të grupit, lexuesit dhe elektricistëve.