Komisariati i Policisë Pukë ka finalizuar me sukses operacionin policor të koduar Arsti, i ndërmarrë për të goditur veprimtarinë e kultivimit të bimëve narkotike. Operacioni u zhvillua pas kontrolleve intensive në terren dhe hetimeve me metoda proaktive në territorin e fshatit Arst.
Si rezultat i ndërhyrjes, forcat e rendit zbuluan 130 bimë të dyshuara narkotike të llojit Cannabis Sativa. Bimët u asgjësuan me anë të djegies, ndërsa një sasi e tyre u sekuestrua në cilësinë e provës materiale për të vijuar procedurat e mëtejshme hetimore.
Në përfundim të operacionit, policia vuri në pranga shtetasin Skënder Nika, 55 vjeç, banues në fshatin Arst, i cili dyshohet si autor i kultivimit të këtyre bimëve. Krahas arrestimit, shërbimet e policisë kanë nisur procedimin penal në gjendje të lirë për kryeplakun e fshatit, shtetasin M. K., 60 vjeç, i cili akuzohet për veprën penale "Shpërdorimi i detyrës".
Materialet procedurale i janë referuar Prokurorisë pranë Gjykatës së Shkallës së Parë të Juridiksionit të Përgjithshëm Shkodër për veprime të mëtejshme ligjore. Policia e Shtetit bëri të ditur se kontrollet në të gjithë territorin e qarkut të Shkodrës do të vijojnë me intensitet, me qëllim parandalimin dhe goditjen e çdo rasti të kultivimit të lëndëve narkotike.
Përditësime
Hetuesit zbuluan se i arrestuari Skënder Nika kishte një konflikt të vazhdueshëm me fqinjët. Sipas burimeve policore, Nika kishte denoncuar më herët parcelat e tyre për kultivim kanabisi, si një përpjekje për të shmangur vëmendjen nga aktiviteti i tij i paligjshëm. Si provë materiale, grupi hetimor sekuestroi një tub vaditës që lidhte banesën e të arrestuarit me parcelën ku u asgjësuan 130 bimë narkotike.