Policia e Komisariatit të Pukës ka finalizuar një operacion në fshatin Berishë të Fushë-Arrëzit, duke çuar në pranga dy shtetas, babë e bir, si autorë të dyshuar të kultivimit të bimëve narkotike. Të ndaluarit janë T. M., 59 vjeç, dhe Y. M., 24 vjeç, banues në të njëjtin fshat.
Sipas njoftimit zyrtar, zbulimi i parcelës ku ishin mbjellë 172 bimë të dyshuara si Cannabis Sativa erdhi si rezultat i kontrolleve intensive në terren dhe informacioneve të siguruara në rrugë operative, në kuadër të operacionit të koduar "Territor i Pastër". Bimët e gjetura në afërsi të banesës së të dyshuarve janë asgjësuar nga shërbimet policore me anë të djegies, ndërsa një sasi e tyre është sekuestruar në cilësinë e provës materiale për nevojat e hetimeve të mëtejshme.
Materialet procedurale lidhur me këtë rast i janë referuar Prokurorisë pranë Gjykatës së Shkallës së Parë të Juridiksionit të Përgjithshëm Shkodër, e cila vijon punën për dokumentimin e plotë të veprimtarisë kriminale.