Specialistët për Hetimin e Krimeve në Stacionin e Policisë Fushë-Krujë, në koordinim me Prokurorinë, kanë finalizuar operacionin e koduar "Kushtet", pas një hetimi me metoda proaktive për dokumentimin e veprimtarisë së paligjshme në fushën e narkotikëve.
Si rezultat, u arrestuan në flagrancë shtetasit Kastriot Bazja, 52 vjeç, dhe Astrit Seferi, 54 vjeç, të dy banues në Fushë-Krujë. Hetimet përfshinë përdorimin e kamerave të fshehta për monitorimin e një parcele në fshatin Zgërdhesh, ku të dyshuarit kishin kultivuar dhjetëra bimë të llojit Cannabis Sativa.
Sipas njoftimit zyrtar të Policisë, përveç bimëve të asgjësuara përmes djegies, u konstatua se të dyshuarit kishin përgatitur terrenin për të kultivuar bimë të tjera. Të dy personat rezultojnë me precedentë të mëparshëm penalë për të njëjtën veprimtari kriminale. Materialet procedurale i kanë kaluar Prokurorisë për hetime të mëtejshme.
Policia e Krujës ka bërë apel për bashkëpunim me qytetarët, veçanërisht ata që jetojnë në zonat rurale, për të denoncuar çdo rast të dyshuar të përshtatjes së tokave për kultivim të bimëve narkotike, me qëllim parandalimin dhe goditjen e këtij fenomeni.