Forcat e Policisë së Tiranës dhe Krujës kanë zhvilluar një operacion antidrogë në zonat e thella malore, veçanërisht në njësinë administrative Cudhi. Aksioni, i cili nisi gjatë së martës, ka pasur si objektiv goditjen e kultivimit të bimëve narkotike, ku deri në këtë fazë të operacionit janë konstatuar dhe asgjësuar rreth 300 bimë kanabis, shifër kjo dukshëm më e ulët se vlerësimet fillestare që flisnin për 5 mijë bimë.
Lënda narkotike ishte e shpërndarë në parcela të vogla, ku secila prej tyre përmbante nga 50 deri në 100 rrënjë. Për kontrollin e terrenit të vështirë, autoritetet kanë përdorur dronë me teknologji të avancuar, ndërsa po vijojnë kontrollet në ambientet e mbyllura ku dyshohet për përdorimin e llambave për kultivim të paligjshëm.
Gjatë operacionit, një efektiv ka qëlluar në ajër për të larguar kafshët e egra të pyllit. Ky veprim fillimisht ngjalli dyshime te grupet e tjera të kontrollit për praninë e personave të armatosur në zonë, çka solli një shtim të vigjilencës nga ana e Policisë së Shtetit.
Në operacion janë angazhuar 15 grupe të efektivëve të policisë. Edhe pse nuk raportohet për persona të arrestuar, grupet hetimore nën drejtimin e Prokurorisë kanë identifikuar disa shtetas që dyshohet se administronin parcelat e zbuluara. Këta persona janë shpallur në kërkim, ndërsa puna për lokalizimin e tyre vazhdon. Aksioni është ende në vijim dhe kontrollet pritet të zgjerohen edhe në zona të tjera të rrethit të Krujës.
Përditësime
Policia e Shtetit konfirmoi asgjësimin e 300 bimëve kanabis dhe sqaroi se të shtënat në ajër nga një efektiv ndodhën për të larguar kafshë të egra.