Në orët e para të mëngjesit të datës 5 qershor 2026, forcat e Komisariatit të Policisë Krujë, të mbështetura nga efektivë të ardhur nga Tirana, kanë nisur një operacion të gjerë kundër kultivimit të bimëve narkotike në territorin e rrethit të Krujës.
Operacioni është përqendruar kryesisht në zonat që prej vitesh konsiderohen problematike për shkak të kultivimit të kanabisit, si Malësia e Krujës, Nikla, Thumana dhe fshatra të tjerë të thellë. Sipas burimeve, kontrollet po zhvillohen në parcela të dyshuara, zona pyjore dhe terrene të vështira për t’u aksesuar, me qëllim parandalimin dhe goditjen e kultivimit të paligjshëm.
Ky aksion është pjesë e masave të intensifikuara në zonë, veçanërisht pas ardhjes së drejtuesve të rinj në Komisariatin e Policisë Krujë. Që nga fillimi i stinës së pranverës, në këtë rreth janë shtuar kontrollet e përditshme në zonat e identifikuara si vatra të nxehta për kriminalitetin.
Aktualisht, operacioni vijon dhe pritet që në orët në vijim të ketë informacion më të detajuar mbi rezultatet e arritura nga forcat e policisë.