Mbrëmjen e sotme, policia ka nisur një aksion të gjerë në zonën e Fushë-Krujës. Forca të Komisariatit të Policisë Krujë, të mbështetura nga njësitë operacionale të Drejtorisë së Policisë Tiranë, kanë vendosur postoblloqe në të gjitha akset kryesore të rrethit Krujë.
Kontrollet synojnë parandalimin e veprimtarive kriminale, ndalimin e personave në kërkim dhe kapjen e atyre që qarkullojnë me armë ose lëndë narkotike. Drejtuesit e rinj të komisariatit kanë vënë nën monitorim zonat e njohura si "të nxehta", ku veprojnë persona me rekorde të rënda kriminale, si dhe zonat problematike për kultivimin e kanabisit.
Aksioni do të vazhdojë gjatë gjithë natës dhe në mënyrë të vazhdueshme për të siguruar rendin dhe sigurinë në të gjithë territorin e rrethit Krujë. Policia ka ftuar qytetarët të bashkëpunojnë dhe të respektojnë rregullat e trafikut.