Në orët e para të mëngjesit të së martës, më 23 qershor 2026, qindra efektivë të Policsë së Tiranës, Komisariatit të Policisë Krujë dhe Forcës Kombëtare të Sigurisë zbarkuan në territorin e bashkisë Krujë për një operacion antikanabis. Aksioni vjen pas një periudhe njëmujore hetimesh proaktive dhe monitorimi të territorit përmes dronëve të teknologjisë së lartë.
Operacioni është përqendruar fillimisht në njësinë administrative Cudhi, ku forcat e rendit evidentuan dhe asgjësuan përmes djegies një numër të konsiderueshëm fidanësh dhe bimësh narkotike të llojit kanabis. Autoritetet konfirmuan se ky operacion do të vijojë gjatë ditëve në vijim edhe në zona të tjera administrative të kësaj bashkie.
Paralelisht me kërkimet në terren të hapur, shërbimet policore janë duke ushtruar kontrolle në ambiente të mbyllura ku dyshohet se kultivohet kanabis me anë të ndriçimit artificial (llamba). Në këtë drejtim, po bashkëpunohet ngushtë me OSHEE-në për të identifikuar zonat me risk për lidhje të paligjshme të energjisë elektrike, të cilat mund të shërbejnë për rritjen e bimëve.
Në terren janë dislokuar grupe të posaçme hetimore, të cilat punojnë nën drejtimin e Prokurorisë për dokumentimin e veprimtarisë kriminale dhe kapjen e autorëve. Policia u ka bërë thirrje banorëve të zonës që të mos përfshihen në aktivitete të kundërligjshme, duke theksuar vendosmërinë për zbatimin e ligjit.
Përditësime
Gjatë një operacioni antikanabis në Krujë, Policia e Shtetit identifikoi 7 persona si të dyshuar për kultivim të lëndëve narkotike. Efektivët asgjësuan 500 bimë kanabis, ndërsa hetimet për zbulimin e zonave të tjera u mundësuan nga monitorimi i rrjetit të paligjshëm të energjisë elektrike.