Pas një hetimi disa-javor me metoda proaktive, shërbimet e Komisariatit të Policisë Pukë kanë finalizuar operacionin e koduar “Gjurmimi” për goditjen e kultivimit të bimëve narkotike. Si rezultat i këtij operacioni, u arrestua shtetasi Tonin Lleshi, 58 vjeç, banues në fshatin Kodërbojë.
I dyshuari u kap në flagrancë në një parcelë në tokë publike, ku ishin mbjellë 105 bimë të llojit Cannabis Sativa. Bimët narkotike u asgjësuan nëpërmjet djegies, ndërsa gjatë kontrollit të ushtruar në banesën e 58-vjeçarit, forcat e policisë gjetën dhe sekuestruan në cilësinë e provës materiale një armë zjarri pistoletë, së bashku me një krehër me municion luftarak.
Materialet procedurale i janë referuar Prokurorisë së Shkodrës. Tonin Lleshi akuzohet për kryerjen e veprave penale “Kultivimi i bimëve narkotike” dhe “Mbajtja pa leje dhe prodhimi i armëve, armëve shpërthyese dhe i municionit”. Në përputhje me legjislacionin në fuqi, çdo person prezumohet i pafajshëm derisa fajësia e tij të vërtetohet me vendim gjyqësor të formës së prerë.