Një operacion i zhvilluar nga Prokuroria pranë Gjykatës së Shkallës së Parë të Juridiksionit të Përgjithshëm Kukës në bashkëpunim me policinë, ka çuar në arrestimin e një 70-vjeçari me inicialet Rr.U., banues në Bashkinë Has. Operacioni u përqendrua në fshatin Vlahen, ku u identifikuan tre parcela të mbjella me bimë të dyshuara cannabis sativa.
Në total, autoritetet raportuan sekuestrimin e 1,874 bimëve narkotike. Përveç kultivimit, shtetasi në fjalë akuzohet për "prodhim dhe mbajtje pa leje të armëve luftarake dhe municionit", pasi gjatë kontrollit të banesës u gjet një sasi municioni, konkretisht 73 fishekë model 56 të kalibrit 7.62 mm, tre krehëra automatiku bosh dhe dy fitila zjarrpërcjellës.
Autoritetet bëjnë me dije se hetimet janë duke vijuar për identifikimin e personave të tjerë që mund të jenë të përfshirë në këtë veprimtari kriminale, si dhe për zbardhjen e plotë të rrethanave të ngjarjes.