Brenda një harku kohor prej 24 orësh, Policia e Kukësit ka finalizuar dy operacione për goditjen e kultivimit të bimëve narkotike. Në kuadër të operacionit "Kalimashi", shërbimet e Komisariatit të Policisë Kukës arrestuan në flagrancë shtetasin F. L., 34 vjeç. Ai u kap duke u kujdesur për 60 bimë të dyshuara Cannabis Sativa, të kultivuara në territorin e fshatit Kalimash, pjesa më e madhe e të cilave u asgjësua me djegie.
Ndërkohë, në vijim të operacionit "Zabeli", të nisur më 11 korrik 2026, efektivët lokalizuan dhe ndaluan shtetasin F. R., 63 vjeç, banues në fshatin Gështenjë. Ndaj tij, Gjykata e Shkallës së Parë të Juridiksionit të Përgjithshëm Kukës kishte caktuar masën e sigurisë "Arrest në burg" për veprat penale të kultivimit dhe prodhimit të lëndëve narkotike. Sipas hetimeve, 63-vjeçari, në bashkëpunim me djalin e tij M. R., dyshohet se kishte kultivuar 215 bimë kanabis në fshatin Gështenjë, ndërsa gjatë kontrollit në banesë u gjetën edhe 3 kilogramë lëndë narkotike e thatë.
Në lidhje me këtë rast, policia ka proceduar penalisht edhe bashkëshorten e të arrestuarit dhe kryetarin e fshatit Gështenjë. Ndërkohë, vijon puna operative për gjetjen dhe kapjen e shtetasit M. R., i cili mbetet ende në kërkim. Materialet procedurale u janë referuar Prokurorisë për hetime të mëtejshme.