Shërbimet e Komisariatit të Policisë Kukës kanë finalizuar operacionin policor të koduar "Zabeli" në njësinë administrative Kalis, me qëllim goditjen e kultivimit të bimëve narkotike. Gjatë kontrolleve në vendin e quajtur "Zabeli i Madh", në territorin e fshatit Gështenjë, u konstatuan 215 bimë të dyshuara të llojit Cannabis sativa, të cilat u asgjësuan me anë të djegies.
Në bazë të hetimeve paraprake, autorët e dyshuar të kultivimit janë F. R. (63 vjeç) dhe djali i tij, M. R. (29 vjeç), banues në Gështenjë, të cilët janë shpallur në kërkim. Në vijim të operacionit, gjatë kontrollit në banesën e F. R., policia gjeti dhe sekuestroi rreth 3 kilogramë lëndë narkotike kanabis.
Pas gjetjes së kësaj sasie, autoritetet kanë proceduar penalisht në gjendje të lirë bashkëshorten e 63-vjeçarit, shtetasen V. R. (52 vjeçe), për veprën penale "Prodhimi dhe shitja e narkotikëve". Po ashtu, është proceduar penalisht edhe kryetari i fshatit Gështenjë, shtetasi S. R., i cili akuzohet për "Shpërdorimi i detyrës". Materialet procedurale i janë referuar Prokurorisë pranë Gjykatës së Shkallës së Parë të Juridiksionit të Përgjithshëm Kukës për hetime të mëtejshme.