Policia e Shkodrës finalizoi më 1 prill operacionin policor të koduar "Faza e parë" në fshatrat Bajzë dhe Gruemirë Çezmë të Malësisë së Madhe. Aksioni u zhvillua në zbatim të masave të planit operacional për parandalimin dhe goditjen që në fazën fillestare të tentativave për kultivimin e bimëve narkotike, mbi bazën e informacioneve nga inteligjenca policore.
Në fshatin Bajzë, shërbimet e specializuara evidentuan një numër të konsiderueshëm filizash të dyshuara kanabisi, të kultivuara në platforma polistiroli me qëllim mbjelljen në tokë. Platformat u shkatërruan gjatë operacionit, ndërsa një pjesë u sekuestrua si provë materiale. Si autorë të dyshuar u arrestuan shtetasit E. Q., 29 vjeç, B. Q., 23 vjeçe dhe A. Q., 26 vjeçe, familjarë banorë në këtë fshat.
Njëri nga të arrestuarit tentoi arratisjen duke u hedhur nga muri nëpër ara, por agjentët e policisë e ndoqtën dhe e prangosën pas një vrapimi të shkurtër. I dyshuari, i veshur me xhup me kapuç, ngriti duart dhe u dorëzua.
Në fshatin Gruemirë Çezmë, në një magazinë u konstatuan platforma të tjera polistiroli me filiza dhe fara narkotike të dyshuara kanabisi. Për këtë rast u shpall në kërkim shtetasi B. R., 52 vjeç, banues në të njëjtin fshat, ndërsa nisi procedimi penal për shtetaset E. R., 41 vjeçe dhe Z. R., 75 vjeçe.
Aksionin e zhvilluan shërbimet e specializuara të Drejtorisë Vendore të Policisë Shkodër, në bashkëpunim me Komisariatin e Policisë Malësi e Madhe, të mbështetura nga Forcat e Posaçme Operacionale dhe repartin "Shqiponja". Materialet iu referuan Prokurorisë pranë Gjykatës së Shkallës së Parë të Juridiksionit të Përgjithshëm Shkodër për veprime të mëtejshme.