Policia e Shkodrës zhvilloi operacionin e koduar Target Group për goditjen e shpërndarjes së lëndëve narkotike në qytet. Specialistët për Hetimin e Narkotikëve të Drejtorisë Vendore të Policisë Shkodër, në bashkëpunim me Seksionin e Mbështetjes Operacionale dhe Forcën e Posaçme Shqiponja, u bazuan në informacione për shitje droge kryesisht tek moshat e reja.
Gjatë ndërhyrjes u zbulua një ambient i marrë me qira në lagjen Manush Alimani, i përdorur për fshehjen, paketimin dhe përgatitjen e lëndëve narkotike për shitje. Në flagrancë u arrestuan shtetasit Niko Fushën, 18 vjeç, dhe Kristian Zallin, 20 vjeç, të dy banues në Shkodër. Ata u kapën me doza të dyshuara kokainë dhe Cannabis Sativa.
Bashkëpunëtori i tyre, shtetasi L. A., 23 vjeç, shpallur në kërkim, dyshohet se kishte marrë me qira ambientin dhe organizonte aktivitetin. Policia vijon punën për kapjen e tij dhe dokumentimin e plotë të veprimtarisë.
Si provë materiale u sekuestruan:
- Doza të dyshuara narkotike kokainë dhe Cannabis Sativa;
- Qindra qese farmaceutike për paketim;
- 5 peshore elektronike;
- 2 celularë;
- 1 armë e ftohtë (shkop metalik);
- 1 motomjet i përdorur për aktivitetin;
- Një shumë parash e dyshuar si përfitim nga shitja.
Materialet iu kaluan Prokurorisë pranë Gjykatës së Shkallës së Parë të Juridiksionit të Përgjithshëm Shkodër për hetime të mëtejshme.