Policia e Kosovës ka hapur një rast hetimor për veprën penale "kryerje e veprës terroriste", pas kërcënimeve të drejtpërdrejta drejtuar zyrtarëve institucionalë. Sipas njoftimeve zyrtare, kërcënimi është realizuar përmes një rrjeti social nga organizata e njohur si "Severna Brigada".
Ngjarja është raportuar në komunën e Zubin Potokut më datë 28 korrik 2026. Njësitet relevante të Policisë së Kosovës janë angazhuar për trajtimin e rastit dhe po vazhdojnë hetimet për identifikimin e autorëve dhe zbardhjen e rrethanave të ngjarjes. Kjo organizatë, së bashku me "Civilna Zaštita" (Mbrojtja Civile), është shpallur zyrtarisht organizatë terroriste nga Qeveria e Kosovës në qershor të vitit 2023, pasi autoritetet kanë konstatuar se përbëjnë kërcënim serioz për rendin kushtetues dhe sigurinë e vendit.
"Severna Brigada" është përmendur shpesh në raporte të mëparshme për incidente dhe retorikë ekstremiste në veri të Kosovës. Kërcënimet e fundit ndaj zyrtarëve pason rastet e mëhershme të nxitjes nga ky grup, përfshirë rastin e para dy muajve kur u shënjestrua kryeministri në detyrë, Albin Kurti, i cili ishte kërcënuar me eliminim fizik. Ky veprim i fundit po trajtohet si një përshkallëzim i retorikës kundër institucioneve të Republikës së Kosovës.