Në orët e para të mëngjesit të datës 30 korrik 2025, nëpunës policorë të SPB Tetovë – NJPB Gostivar zhvilluan një aksion kontrolli në dy objekte hotelierike në juridiksionin e Gostivarit. Operacioni u zhvillua në intervalin kohor nga ora 02:00 deri në orën 04:00.
Detajet e arrestimeve
Në fshatin Çegran, rreth orës 02:00, u ndalua shtetasi M.H. (50) nga fshati Forinë. Sipas njoftimit të policisë, i dyshuari tentoi të pengonte kontrollin duke mbyllur derën kryesore të lokalit dhe duke u kërkuar personave të pranishëm të largoheshin. Megjithatë, forcat e rendit ndërhynë shpejt dhe bllokuan daljen e pasme të objektit, duke parandaluar arratisjen e disa prej personave të pranishëm.
Në një tjetër objekt hotelierik, në territorin e Njësisë Policore Gallatë, policia arrestoi shtetasin A.A. (53) nga Gostivari, pasi gjatë kontrollit fizik atij iu gjet një sasi marihuane.
Gjendja e shtetaseve të huaja
Si rezultat i inspektimeve, autoritetet shoqëruan gjithsej 15 shtetase të huaja, të moshës nga 19 deri në 40 vjeç, me shtetësi nga Serbia, Shqipëria dhe Kolumbia. Nga këto, 11 persona u gjetën në objektin në fshatin Çegran, ndërsa 4 të tjerë në objektin në rajonin e Njësisë Policore Gallatë.
Sipas Ministrisë së Punëve të Brendshme, këto shtetase po qëndronin në territorin e Maqedonisë në kundërshtim me qëllimin e lejuar të qëndrimit turistik. Të gjitha gratë e ndaluara janë dërguar në stacionin policor për dokumentimin e plotë të rastit, ku ndaj tyre do të vijojnë procedurat ligjore përkatëse.