Mbrëmjen e 2 gushtit 2026, zona bregdetare e Palasës u alarmua nga të shtëna me armë zjarri që dyshohet se u qëlluan nga një jaht i ankoruar në det. Sipas raportimeve, incidenti ndodhi rreth orës 21:00, gjatë kohës kur në bordin e mjetit lundrues po zhvillohej një festë. Dëshmitarët në zonë përshkruan momente paniku, duke pretenduar se krisma ngjanin me shkarkimin e një karikatori të tërë.
Menjëherë pas marrjes së njoftimit nga qytetarët, shërbimet e Policisë Kufitare dhe Njësia Policore Detare u vunë në ndjekje të mjetit lundrues për të bërë të mundur identifikimin e personave në bord dhe zbardhjen e rrethanave të ngjarjes. Për sigurimin e perimetrit dhe kontrollin e zonës, janë angazhuar gjithashtu efektivë nga Komisariati i Policisë Himarë dhe Stacioni i Policisë Dhërmi, të cilët po kryejnë kontrolle përgjatë vijës bregdetare.
Deri në këto momente, autoritetet nuk kanë raportuar për të lënduar. Operacioni për ndalimin e jahtit është ende në vijim, ndërsa policia ka njoftuar se informacion i plotë do të bëhet i ditur pas përfundimit të veprimeve të para hetimore dhe dokumentimit të rastit.
Përditësime
Pas dy orësh ndjekje, Policia e Shtetit ka ndaluar jahtin në kuadër të operacionit të nisur pas të shtënave në Palasë. Mjeti është duke u shoqëruar për në Porto Palermo për hetime të mëtejshme. Operacioni u zhvillua nga Delta Force, FNSH dhe Policia Kufitare. Gjatë ndjekjes, jahti u përpoq t'i shmangej identifikimit duke lundruar pa drita, ndërsa dy persona në një gomone të lidhur me mjetin u detyruan të ktheheshin në bord pas ndërhyrjes së forcave të rendit.
Policia e Shtetit ka konfirmuar se të shtënat e regjistruara në Palasë janë kryer në ajër. Personat që ndodheshin në bordin e jahtit janë shoqëruar në komisariat për t'u marrë në pyetje në lidhje me ngjarjen.
Policia e Shtetit ka identifikuar katër shtetasit që ndodheshin në bordin e jahtit: B. C. (31), L. H. (31), A. K. (49) dhe P. Gj. (60). Pas ndjekjes në ujërat përballë Himarës, mjeti u shoqërua në Porto Palermo. Gjatë operacionit, jahti lëvizi pa drita, ndërsa një person u hodh në det dhe dy të tjerë tentuan arratisjen me gomone përpara se të ktheheshin në bord. Ndonëse kontrollet nuk gjetën armë apo sende të kundërligjshme, grupi hetimor po kryen ekspertiza për faktorët plotësues të qitjes, për të verifikuar dyshimet mbi përdorimin e armëve të zjarrit pas të shtënave të raportuara në Palasë.
Policia e Shtetit ka identifikuar katër personat që ndodheshin në bordin e jahtit të ndaluar: biznesmenin Afrim Kastrati dhe shtetasit Bruno Çela, Leonard Haso dhe Pashk Gjini. Operacioni, i mbështetur nga Forca Kombëtare e Sigurisë për sigurimin e perimetrit, u ndërmor pas të shtënave në Palasë. Pamjet nga momenti i ndërhyrjes tregojnë se katër personat ishin në gjendje të zhveshur në momentin kur forcat policore mësynë mjetin lundrues.
Policia e Shtetit ka liruar katër personat e ndaluar pas incidentit me të shtëna në Palasë. Të dyshuarit kanë mohuar çdo përfshirje në ngjarje dhe posedimin e armëve. Burime nga grupi hetimor bëjnë me dije se hetimet po fokusohen te dyshimet se personat mund të kenë qenë nën efektin e alkoolit. Autoritetet sqaruan se tentativa për arratisje drejt Greqisë me gomone pasoi braktisjen e përkohshme të jahtit nga personat në bord.